1. Fasnachtswucheänd

Dnervosität isch abgflacht, de 1. Faisse isch verbi!

E mänge het de Donnschtig mit zittere, warte, Zit z tot schlo und umme wuusle verbrocht. Wie all Joor hei alli druf gwartet, dasses äntlich los goht!Wie immer si mir zKarsau gstartet und im Dütsche het mr eus wie immer härzlich und begeischteret empfange…nach em einte oder andere Aquarium isch es witter gange uf Hellikä und nacheme super Uftritt hei mr dört echli dHalle ufgmischt.

Nacheme Obe Ruhepause isches am Samschtig denn witter gange, grad nachem Schminke simmer uf Rhyfälde und hei dört für die Änglische Ustuschschüeler es paar Lieder zum Beschte geh…nacheme Apero im Roothuus und emene feine Znachtässe simmer witter uf Minseln…dört isch dPoscht wiedermol abgange und mir si guet iigstimmt gsi für de Füürball in Rhyfälde…au dört hei mr dHalle grockt und nochär wittergfiiret wie die Grosse! ))

Es super erschts Fasnachtswucheänd isches gsi und cha gärn eso wittergo!!!Alles geili Sieche!!!

Lachen, 23.1.10

Dr Startschuss isch gfalle!!!Serscht mol die Saison hämmer eus in euses neue Kostüm gstürzt, serscht mol hei mr farbigi Gsichter gha und festgstellt, dass mr unglaublich edel usgsehnd!…scho uf de erschte Meter im Car het sich abzeichnet, dasses en guete Obe wird…und tatsächlich!! Mr hei de Bäre in Lache grockt (het doch Bäre gheisse oder? …)

Nachdem mr zerscht mol dusse es paar Lieder gspielt hei simmer denn ine und hei dbedienig ade bar grad echli gforderet! …uf die halbi zähni hämmer denn dobe im Saal gspielt und dene viele verchleidete Lüt mol richtig igheizt! Nachem Uftritt hei mr bis am zwei Zit gha zum de Fasnachtsuftakt in volle Züg zgniesse! S Tanzbei isch gschwunge worde, Tango het me tanzt und die suscht  meischt seriöse Mitglieder hei sogar ihri Künscht ade Stange usteschtet! ))

E geile Obe isches gsi und es freue sich glaub alli ufe Donnschtig, will denn goht dFasnacht richtig los und schliesslich ghöre mir bim Probe immer wieder: ”Dänket a Hellikä”

PS: Raze, ich glaub ich ha nachem erschte Obe scho gunne! ))

Fasnacht 2010 – es cha losgoh!!

Liebi Schnägginne, Liebi Schnägge…Liebi Homepage-Bsuecher…

De Samschtig am 23. Januar foht für eus Bierschnägge dFasnacht a!!!!!Lang hämmer probt und de Benji het rächt weener seit: Dir heits verdient jetzt Fasnacht zmache!!!…dere Meinig simmer alli au!

Uf eusere Homepage und ganz bsunders im Blog isch scho länger nüt meh gange…damit sich das wieder änderet, wärde mr das Johr e Art Tourtagebuech füere…nach jedem Uftritt und Tag wommer furt gsi sind, wird es chleises Textli verfasst, mit Iidrück, Emotione und Erläbtem…ich hoff, dass sich so au es paar Schnägge motiviert fühle!