Fasnachtswuche

Nachdem dr Startschuss gheit isch simmer am Fasnachtsfrittig in Matzedorf gsi…Schnäggenacht!! isch nit emol esooo gross gsi de Alass und trotzdem hämmer e super Obe gha! Nach ere Stärnwanderig und ere Beizetour simmer dört au no amene Monsterkonzärt aträtte…ganz e glatti Sach…mer händene grad mol rasch euses green day glehrt…O-Ton Benji: hey, lönd doch de andere au mol e chance!!

Am Fasnachtssamschtig simmer denn uf Bassersdorf…wommer ide Halle acho si isch noni sooo vill los gsi!   Spöter simmer denn aber witterzoge und hei dMänschemasse gfunde…im Gegesatz zu Matzedorf isch das e rächt grossi Aglägeheit gsi…vill Vercheideti, vill Guggene, aber au vill Chaote! Es het sich uf alli Fäll glohnt…scho numme damit de Weiss sini 2 Hünd het chönne mit Hei neh!

Am Sunntig isches denn witter gange mit eusem eigene Umzug zMagde…am Chinderball simmer wieder mit de CHleinschte uf de CHnü ummegrutscht und denn i Car gstiege richtig Karsau Narremärt!…neues Jahr, neue Chlapf…ääähhhh, neues Glück! mer muess do a dere Stell mol amerke, dass mir zu dem Zitpunkt scho 4 Täg unterwägs si, übernächtigt und mängisch müed…aber egal, idem Karsau blüeht jetzt eifach jede uf!!! Die einte si chli absits abgsumpfet und hei mol probiert wievill Feigling mr cha trinke a somene Obe…mr muess säge ade Föteli und a de Chläpf aaa sind si keini Feigling und hei gunne! …doch au mir andere hei eus nit lumpe lo…idere Fischerstube si gsprützti Süessi und suuri Komischi übere Tisch öppis ganz verruckts…die Dütsche hei sich sogar gwunderet dass mir so no chönne spiele! …im Buss isch wieder mol herrlich gsi, wo sich alli agheiterete, sehr agheiterete und sehr-sehr agheiterete versammlet hei zum uf Möhli fahre!! zägg zMöhli bi de Sonderbar ustrümmle, anestoh und e geile Uftritt anelegge, as hätts zKarsau nur Sirup geh, dass chönne mr ebbe!!…mr cha jo nohär denn amme no e Holdrio neh und denn MOIN! …oder so wie de Raze…no e Suure Moscht und denn Doppel-MOIN…ab über alli Holzbänkli! ))

Es isch Mentig worde und langsam isch de erschte de Gedanke as Ändi cho…licht wehmüetigi Gsichtsusdrück sind immer hüfiger worde…DFasnacht het scho villi zeichnet gha…Lippe und Händ hei blüetet, Stimme si fascht nümm hörbar gsi und ghuestet isch worde wie bi de Wältmeischter!…aber wenn mr meint dass en Bierschnägg denn lahmet, de het sich tüscht…e super Uftritt hämmer anegleit am Guggekonzärt zMöhlin…und alli hei sich gfreut uf e Umzug am nechschte Tag…

Und denn isch er cho dr gfürchteti Fasnachtszischtig…dr letscht würklichi Fasnachtstag…Bi super Sunneschii hei mr dörfe iistoh füre Umszug…nach em Umzug simmer denn nochli ummezoge und hei ide verschiedene Beize gspielt…als letschti Station simmer ide Sonderbar acho und hei dört no gspielt…nachdem dr Raze im Benji denn dankschön gseit het für sini Zit als Spielfüehrer isch bide meischte fiirobe gsi…die meischte hei sGreenDay nur no unter Träne chönne spiele…es isch e Truurige, e Schöne und e Ufwüehlende Ufritt gsi!!…nachhär het sichs denn chli verteilt..alle hei ihre letscht Obe chli anderscht gstaltet…villi si in de Sonderbar bliebe hange und hei dört dr Max gmacht! für die ganz hart gsottene hets bi de Frau Kym denn no Spiegeleier und Brötli geh…mr muess adere Stell erwähne, dass nur 4 Bierschnäggefraue bis denn durezoge hei…bises hell worde isch…die hei da Johr gunne!

Es isch e super Fasnacht gsi…euse Zämehalt isch das Johr wieder ganz extem spürbar gsi…es isch es superschöns Gfühl wemmer e Teil vo dem Verein isch…will mir si alles geili Sieche!!…aber anderscht!!!

PROUD TO BE A BIERSCHNÄGG!!!! …ich dänk do sprichi jedem vo eus us de Seel!

3. Faisse – Lozärn, Karsau, Schupfart

Und los isch es gange…die offizielli Fasnachtswuche isch iglüttet worde.

Einigi vo eus Bierschnägge sind wie all Joor miteme Büssli uf Luzärn an Urknall…um die 2 Znacht het mr agfange alli isammle und los isches gange in Richtig Fasnachtsstadt!Es isch wie immer e geniale Tag gsi und unter anderem sicher es Fasnachtshighlight…villi gueti Guggene hei mr ghört ( ämmel einigi vo uns …), luschtigi Kostüm und Gfährt hei mr gseh und im Pinocchio hei mr doch au wieder dr ein oder ander Lutz übercho !

Direkt vo Luzärn isches witter gange zum schminke…und denn ab uf Karsau. Obwohl mr früehner dra gsi sind als anderi Joor, isches am Wildeball herrlichscht abgange…mir Bierschnägge hei eusem Name wieder mol alli Ehr gmacht…inecho, ab vord Bühni und ruckizucki wirds Füüdle gschwunge! …einigi Männer hei das leider it mitbecho, si sind ide Bar gsi und hei Bildli agluegt!

Nacheme chleine Fuessmarsch in winterlicher Umgäbig zum Car simmer denn witter uf Schupfert..au dört hei mr immer no möge und hei dHalle chli ufgmischt…mr muess au säge, dassd Luzärner Delegation das Joor erstuunlich fit dure Obe cho isch und au nach fasch 24 Stund immer no es guets Bild gmacht hei! Obwohl einigi nach Karsau roti Chöpf gha hei ( Manu, Rölfi, Benji…moin! …) wäg dene “Tomate“ hei mr is zSchupfart it müesse verstecke…nachem Uftritt simmer no chli idr Halle ummetrümmlet und es git sogar Manne, die hei ihri erschti Tanzstund gha und warte hüt uf die 2!Sehr vorbildlich! Anderi gönd das Thema eher unkonventioneller a und stönd enand ufd Füess bim Tanze!

Was söll mr au säge, es isch wieder emol e geile Obe/ Nacht gsi…eus stoht no die ganzi Fasnachtswuche bevor! Hüt simmer in Matzedorf SO und si gspannt was eus dört erwartet…aber Augen auf es sind ganz hinterlischtigi Chlämmerli im Umlauf, gäll Raze!

Uf e geili Sach hüt zobe, bloose mr de Teppich use!

2. Fasnachtsweekend

Und wiedere Rundi isch verbi!

Es super Fasnachtswucheänd hämmer wieder hinter eus!! Am 2. Faisse simmer zerscht in Dossenbach im Dütsche gsi…e glatti Sach: zerscht macht me en OL durd Halle zum “einen Getränkebon“ löse und nochär probiert mr mol die ganz Getränkecharte dure, was mr chönnt trinke, wo nit NUMME nach Schnaps schmöckt….unglaublich die Dütsche! Das muess mol gseit si, mir chönne amme gar nüt defür, dassmr voll si, aber die tüend eifach unglaublich vill Alkohol i euses zsuffe! )))

Nach dem Abstächer is Nochberland simmer denn zrugg id Schwiiz uf Zuzge, wommer am 1 au no gspielt hei…es tiptops Fäscht hei mr gha!

Am Frittig isch denn offiziellerwiis Ruhetag gsi…E Delegation vo 6 Schnägge isch denn aber doch im Tenue complete uf Eike go dHalle ufmische!…aso ade Shotbar het me eus nach dem Obe kennt und au bide Securitas hei mr en guete Iidruck hinterloh…en rundum glungene Obe!! )

Am Samschtig wieder mit allne an Bord isches witter gange Richtig Görwil, ab and Swissnight…trotz afänglich chli wenige Lüt isch dStimmig gli guet gsi und beschtens gluunt isch mr scho gli wieder im Car Richtig Magde gfahre. Dört am Maskeball hei mr en super Uftritt gha…so guet, dass dr Bruno nach en Uftritt sogar Gält im Huet gha het!!

Am Sunntig hei denn alli wieder gli zu de Fädere us müesse, denn s Narreträffe isch agseit gsi! Das Joor simmer dodefür uf Schwörstadt gfahre…Will mr scho als 11 gstartet si isch dr Umzug für eus gli losgange…mitem Albi als Täfelibueb simer loszooge…Lüt am Strooserand schiine e Freud gha zha a eus!!Chum simmer abgloffe simmer au scho wieder im Ziel gsi, dr Umzug isch gar it so verruckt lang gange! Nachdem alli sInstrumänt deponiert gha hei, isch jede chli ine anderi Richtig go luege…es paar si dr Umzug go fertig luege, anderi si bi de Halle bliebe, hei Guggene glost, ufem Tischtennistisch mit de Rhybieschter tanzt und Glüehwii vernichtet…und wieder anderi si ide diverse Beizli ein go neh! Villi Fasnachtskollege het mr troffe a dem Tag…überall isch gschwätzt, glacht und agstossse worde!!:)

Wos scho idunklet het simmer denn zrugg ufe Car Richtig Hei…am Grüschpegel im Car a sind doch die meischte rächt gschluucht gsi!…es isch scho lütter gsi! …überall si es paar usgstiege, kei Ahnig wer wo ahne isch! Ich weiss nur was die gmacht hei wo zMöhlin use si…ab is Warteck!!!usghungeret simmer gsi und hei öppe z 16te en grosse Tisch in Beschlag gno…es isch it lang gange und dStimmig isch ide Wärmi wieder uftaut!…vo Lamas und Pfaus isch dRed gsi )) und mr hei en sauluschtig Abschlussobe vom 2. Fasnachtsweekend dörfe erläbe!! Im Bett hei denn dänk öppe alli gmerkt wies aghänkt het!

Aber Juhuuuiii, jetzt gohts denn erscht richtig los!!…am Mittwuch zNacht fallt für einigi scho dr Startschuss in Lozärn am Urknall…jedes Joor e Gaudi!!…aber spötischtens am Donnschtig zobe bim schminke heissts für alli: Loooos gohts zunere Wuche Fasnacht am Stück!!!

Ich wünsch eus allne e ganz e geili Fasnachtswuche!!!…und dass mrs soooo guet hei wie mrs bis jetzt gha hei, denn cha nämmli nüt, aber au gar nüt falsch go!!!