Und los isch es gange…die offizielli Fasnachtswuche isch iglüttet worde.
Einigi vo eus Bierschnägge sind wie all Joor miteme Büssli uf Luzärn an Urknall…um die 2 Znacht het mr agfange alli isammle und los isches gange in Richtig Fasnachtsstadt!Es isch wie immer e geniale Tag gsi und unter anderem sicher es Fasnachtshighlight…villi gueti Guggene hei mr ghört ( ämmel einigi vo uns 
…), luschtigi Kostüm und Gfährt hei mr gseh und im Pinocchio hei mr doch au wieder dr ein oder ander Lutz übercho !
Direkt vo Luzärn isches witter gange zum schminke…und denn ab uf Karsau. Obwohl mr früehner dra gsi sind als anderi Joor, isches am Wildeball herrlichscht abgange…mir Bierschnägge hei eusem Name wieder mol alli Ehr gmacht…inecho, ab vord Bühni und ruckizucki wirds Füüdle gschwunge! 
…einigi Männer hei das leider it mitbecho, si sind ide Bar gsi und hei Bildli agluegt!
Nacheme chleine Fuessmarsch in winterlicher Umgäbig zum Car simmer denn witter uf Schupfert..au dört hei mr immer no möge und hei dHalle chli ufgmischt…mr muess au säge, dassd Luzärner Delegation das Joor erstuunlich fit dure Obe cho isch und au nach fasch 24 Stund immer no es guets Bild gmacht hei! Obwohl einigi nach Karsau roti Chöpf gha hei ( Manu, Rölfi, Benji…moin! …) wäg dene “Tomate“ hei mr is zSchupfart it müesse verstecke…nachem Uftritt simmer no chli idr Halle ummetrümmlet und es git sogar Manne, die hei ihri erschti Tanzstund gha und warte hüt uf die 2!Sehr vorbildlich! Anderi gönd das Thema eher unkonventioneller a und stönd enand ufd Füess bim Tanze!
Was söll mr au säge, es isch wieder emol e geile Obe/ Nacht gsi…eus stoht no die ganzi Fasnachtswuche bevor! Hüt simmer in Matzedorf SO und si gspannt was eus dört erwartet…aber Augen auf es sind ganz hinterlischtigi Chlämmerli im Umlauf, gäll Raze!
Uf e geili Sach hüt zobe, bloose mr de Teppich use!
3 Kommentare
ich bi jo würklich überglücklich, dass ändlich fasnacht isch:-) falls öber mi stimm findet, bitt ich, die mir z bringä – evt. isch si im pinocchio:-)
Servus!
Mi Arbetskolleg, seines Zeichens Trummler bi de Steinlemer (eini vu de gröschte Basler Cliquene) und au usgangstechnisch üsserscht Basel-orientiert isch absolut von den Socken gsi vu eusem Cherusball! Und eus, sprich euse Uftritt, het er eifach nume Hammer gfunde 
Är het mer au schu versproche, as er negscht Johr widr chunnt!
I dörf es dicks Lob a eus alli witerleite
E schöns Komplimänt vomene aktive basler Fasnächtler, die sin jo scho sehr vo ihrer Fasnacht überzügt.
Guet, guggetechnisch sin si halt in Basel nit so verwöhnt, do wär vermuetlich no mänge überrascht, wie das au no chönnt dööne, wenn mir hüt zoobe uff em Barfi würde go iiheize…