Bester Auftritt der Saison ;)

Geschter isches sowit gsi…sit langem hei alli scho uf das Datum hiigfieberet unds scho fascht nümm chönne erwarte…aber ich griff in de Gschicht scho chli vor, villicht mussi am Afang afange…🙂

In de letschte Wuche het eus en Doodle vo eusem Spielfüehrer erreicht…mir si agfrogt gsi zum amene Geburtstag go spiele…mer sell sich bitte iiträge…gesagt, getan…es relativ üübersichtlichs Grüppli isch am Schluss i dem Doodle grüen gsi….aber hey, kei Problem, do gömmer!!!

Guet…geschter…am 11i bim Schiffacher stönd zwoi ellei dört, luege chli blöd us de Wösch und froge sich, wo die andere denn so bliebe…es wärde scho Plän gschmiedet, dass mr jo zzwoite chönnt Amazing Grace spiele (als würde sie das chönne🙂 ) …wo denn de dritt Bierschnägg iitrifft isch dErliechterig gross, die erschte zwoi hei nämmli s viertel ab vorem 11i überläse😉

Denn sind sie denn aber cho…juuuuuu, Autowiis, gfüllt bis ufe letschti Platz…es Wunder dass nit no es paar mitem Car cho si….Sparwitz, mir sind am Schluss 12 Persone gsi, wo sich ufgmacht hei für „die grosse Aufgabe„!🙂

Es het e herrlichi Blueschtfahrt gfolgt über Wald und Wiese, Stock und Stei…eimol uf Frankriich iine, denn wieder us Frankriich usä🙂 mir sind gfühlt in jedi Stross abboge, wo links eweg gange isch, numme zum luege, wie guet mr dört mit 5 Autos cha cheere…ich säg numme: „Lönd sie dr Motor lo laufe??!!!!„ :) …aber denn simmer acho…bim Idefix!!! Speuz isch jo dazumals kei Lamafarm gsi…aber damoll isches tatsächlich eini gsi!!! Lamas, Geisse, Hüehner, Strausse, Gallowayrinder…mr muess allerdings säge, dasses eus dLamas am meischte ado hei…aber so richtig noch het sich niemer nöcgh anegetraut…komisch😉 …Feiglings!🙂

Mir si jo aber nit wägem Streichelzoo dört gsi, darum sind denn au dInstrumänt gfasst worde und ine isches gange…denn hämmer 4 Stückli gspielt oder 5…ich weisses nümm, ich bin so hiigrisse gsi vo dr überragende Qualität vo eusere Interpretation / Improvisation…do hani nümm chönne mitzelle😉 …chumm isch eis Stückli fertig gsi hesch müesse ummeluege und chönne säge: Die Halle tobt………………..not!😀 nei, ganz im Ärnscht, es isch es sehr es dankbars, liebs und wohlwollends Publikum gsi, das het eus sehr gfreut! …..usser de Herr mitem Schal an Tisch 1 ….pffffff😉

Nachem Uftritt hets denn no es Bierli oder es Wyyli geh und denn isches wieder zrugg gange, damol ohni dr Umwäg nach Frankriich😉

Spass bi sitte: …jo mir si scho meh gsi und jo mir hei scho besser gspielt, aber so schlächt isches tatsächlich würklich nit gsi für das illuschtre Grüppli….und eis isches ganz sicher gsi: e sau luschtigi Sach !!!🙂

I dem Sinn: wänd au Sie, dass mit Ihres Lama chömme amene Sunntig cho bespasse…mälde sie sich doch bi eus!😉

 

Fasnachtszischtig

Nacheme feuchtfröhliche Fasnachtsmentig simmer am Zischtig früsch tumbleret in letschte Fasnachtstag gstartet…scho wenn sletscht mol is Sprützrümli chunnsch isches irgendwie komisch…will die letschte Täg isches chli gsi wie bi „und täglich grüsst das Murmeltier„, mr het gwüsst morn wird au wieder gschminkt und übermorn und überübermorn und…jo ebbe…🙂 ..während em Schminke sind immer wieder die neuschte Wätterradar überprüeft worde und Theorieä erstellt, wenns jetzt rägnet und wenn nit und wenn mir starte und öbbs denn chönnt länge troche is Ziel zcho. Im Schiff zMöhli acho hets zerscht mol e Stärkig geh…zur Vorspies e Gmüessuppe…ich glaub einigi hei grad de Schisser übercho, will das mit Abstand sGsündischte gsi isch, wo sit laaaangem euser aller Magä erreicht het😉 Vo dusse si keini guete Nachrichte cho…„es tuet scho wieder wie geschter zobe„, hei dRaucher brichtet…grusige Räge und Sturmböe hei sich Platz gmacht…jä bravo! Will mir chli witter hinde gloffe si, sind mr au chli spöter iigstande…es het no chli tröpfelet und wichtigi Entscheidige si agstande:…Pellerine a? Pellerine nit a ? Fleecepullover a? Fleecepullover nit a ? Mir hei denn mol afo laufe und es het tatsächlich ufghört rägele…und mir si troche bis ins Ziel cho! …und do red ich jetzt nur vo üsserlich troche, will inne abe isch guet gwässeret worde🙂 Mir hei wieder es paar Ängeli debi gha, wo eus während em Umzug mit villne leckere Sache verpflägt händ…und will de Umzug irgendwie amme chli is stocke cho isch, hesch halt nit nur eis Schnäpsli chönne neh sondern grad drei!🙂 haha, das wird denn rächt schnäll rächt glatt😀 …eus isch de Schalk scho guet im Nacke ghockt, wommer dVerarschig füre Agi plant hei…de Plan isch gsi vor de Brugg vom Ryburg uf Möhli is Publikum zverschwinde…geplant, getan…zmitts im Dschungel isch sKommando cho zum verschwinde…und alli Blöser hei sich irgendneume versteckt…sTiming hätt nit chönne besser si, will das Lied wer no wittergange und de Agi het sich grad nit so uf eus gachtet…woner sich umtreit zum eus wieder iizälle, isch eifach nur no de Schlag dört gstande…alli Blöser weg!🙂 …mir sind denn wieder hindeführe cho mitem Narcotic…de Streich het nit nur eus Spass gmacht, sogar sPublikum het gjohlet🙂 …und de Agi het wahrschiindli ghofft, dass de Guggus für de Räscht vom Umzug verbi isch😉 …mir si tatsächlich ohni wittere Zwüschefäll is Ziel cho…immene rächt luschtige Zuestand🙂 es het denn bi de Kanzlei nochli chönne gfiiret und gmüetlich zämegsi wärde, bevors zum Ässe gange isch…dinne isches mollig warm gsi während dusse grad schnäll dStimmig kippt isch…starki Sturmböe und Niderschläg hei Möhlin packt und spötischtens wo dFüürwehr usgruckt isch, het mr gwüsst, das isch nümm ganz ungföhrlich…es het es Zält glüpft gha, aber zum Glück isch niemerem öppis passiert!

Swätter het sich denn wieder beruhigt und mir hei chönne id Zunftstuube go spiele…cools Publikum!!!!…alli si uf de Bänk gstande!…und bi eus zwoi ehemaligi Bierschnägge uf de Bühni, wo 2 altbekannti Lieder mitgspielt hei, als gäbts kei morn!🙂 Nach dem Uftritt isch es churzes Päuseli agseit gsi und denn were no witteri Uftritt ufem Plan gstande…aber nei…sUnwätter isch zrugg cho! Mr het sich scho gar nümm getraut ines Zält inezgoh, also simmer dusse im Schärme gstande, was gar it so eifach isch wenns querewäg rägnet:/

Mr si denn doch no chli ins MGV Zält und hei dänkt mir nutze eusi Zit chli sinnvoll und mache chli Wärbig für euses neue zwoite Standbei…eusi Tanzkürs!🙂 Zerscht isch „extravagantes Tanzen für Anfänger„ mitem Instructor Nicci ufem Programm gstande…mir hei dHänd und Ärm verworfe und eus fantastisch bewegt!!! Gwüssi hei zwar gseit es gsech us, als würde mr euse Name tanze…aber das isch nur vo settnige cho, wos Konzäpt noni richtig verstande hei…das MUESS so usgseh!!!🙂 des Spasses noch nicht genug, hei mr denn au no grad Modul 2 beworbe…„Muskelkater im Arsch, leicht gemacht„ mit den Instructors Mättu und Celle…simmer hindere und führe und hindere und führe und hindere und führe…e sau Spass!!!🙂 das hätt no stundelang so chönne witter go, aber…die Pflicht het grüeft…nacheme Uftritt im MGV, simmer no zu de Chummerbuebe, wommer grad näbem einzige neue Open-air Zält vo Möhli gspielt hei😉 …nachem Uftritt hets denn no es paar „Rosamunde Pilcher-Momänt geh„ – Häääärzergriffend (es paar wüsse, was i mein)😉

Und denn isches nochli witter gange:

 

Wer trabt da durch Möhlin bei Wetter und Wind

es sind die Bierschnägge mit es paar Bier im Grind

wenn alle schon lange feiern und lachen

tun die Bierschnäggen nämlich noch ein paar Auftritte machen

Dorf uf, Dorf ab…

der Mättu hält seine Truppe auf Trab!

Der letzte Auftritt dann bei der Sonderbar

die Stimmung da, wie immer wunderbar!!!!🙂

Alle sind beansprucht und wir merken, wie unser Motto immer ischt gsi…

nach dieser Fasnacht brauchen wir kein Wochenende, sondern eine Delphintherapie🙂🙂🙂

 

Dr letscht Uftritt vom Johr…immer en spezielle Momänt! Nach monatelangem Probe, nach tagelangem Zämesi, fiire und lache, sell das plötzlich alles es Ändi ha…es mische sich Erliechterig, Müedigkeit, Wehmuet und Truurigkeit, dass das alles jetzt es Ändi nimmt…

Es isch es tolls Johr gsi…es ganz es tolls…Zit isch sooooo schnäll verbi gange, mir chönnes chuum glaube!!! …das lit sicher dra, dass eusi Stimmig a dere Fasnacht eifach sensationell guet gsi isch!❤

Mir danke allne wo eus in irgend ere Form unterstützt hei…allne, wo eus chömme cho lose, cho afüüüre…allne, wo mit eus fiire, mit eus lache und die 5ti Johreszit zu dem mache, was mir so liebe! Danke, danke, danke!!!!

Wer noni gnueg het, de isch bi eus härzlich willkomme am Cherusball nechscht Samschtig zMagde im Gmeisaal🙂

Somit verabschiede mir eus mit eusem Tagebuech für das Joor…schön das sovill amme mitläse und eusi Erläbnis teile…es isch eus e Freud gsi!🙂

Bis nechscht Joor❤

Fasnachtsmentig

Nachere guete Mütze Schlof (für die meischte) simmer hüt in Schlussspurt gstartet. Bim Schminke hei mr eus no in Sicherheit gwähnt…„mir hei hüt Glück mit em Wätter„! Jäääjääää…bi dr Pizza zum zNacht isch sWätter no tiptop gsi…schöööön troche…aber wommer eus denn ufe Wäg gmacht hei zum place to be, zu de zwoi Bühnene vom Guggekonzärt isches losgange…es het grägnet…nei, dasch jetzt liecht untertriebe….es het mol links gseicht, denn mol rächts gschiffet, denn mol Bindfäde gradewäg abegschüttet…dStross zwüsche de zwoi Bühnene isch immer leerer worde und mir hei gwüsst…mir si die Letschte, wo dra chömme…wenn das mol kei verseichti öffentlichi Prob für uns sälber git…

„Parat mache sich uf de Bühni dBierschnägge„, hets us de Lutsprächer tönt!…Verstande, parat mache…alli si uf die Bühni kraxlet und es het sich doch schomol es nätts Grüppli vor eusere Bühni versammlet…Vättere und Müettere und Brüedere und Schwöschtere und Fründe und Fründinne und ehemaligi Bierschnägge, wo eus au im schlimmschte Wätter treu chömme cho lose…❤

Denn stohsch dört, dBühni no dunkel, will uf dere vis a vis spielt jo au no e Gugge…und obwohl mir eigentlich nur am Warte gsi sind, hei sich immer meh lüt zu eus übere begeh und hei eus echli bim Warte zuegluegt🙂 …denn isch die ander Gugge fertig gsi mit spiele…Spot an und eis, zwoi…dEier vom Tiger!!! …und us allne Löcher sind dLüt cho lose und mir hei en tolle Huffe an Publikum zämebrocht!!! Danke VILLMOL liebi Lüt, dass dir im Räge so trotzt heit zum eus lose…mir freue eus über das würkli immer sehr!

So bim zwoit letschte Lied hets denn afo rägne…das isch scho fascht Sintfluet-artig gsi…euse Spielfüehrer mitem komplette Schlag in strömendem Räge…das het vo eus obe aso usgseh, wie immene Musigvideo us de 90 er Johr😀 (Backstreeeeets back…alright!! :)  ) …mir si würkli froh, hets eus die aso nit grad devogschwemmt!!!😉

Nachere chliine Pause im Schärme isch no e Uftritt bim Wasserfahrverein agseit gsi…idere Pause hets immer chli dätscht…mir vermuete do si irgendneume Umzüg losgange🙂 …apropos Umzüg…do hei mr no ein im Agebot…morn gohts für eus adr offizielle Fasnacht 2016 es letschts Mol zum Schminke und denn an Umzug uf Möhlin…

Falls dr nonüt vor heit…organisieret es Zält und es paar Lüt, wo das würde jewiils amene Egge hebe…denn chönnte mr im Schärme laufe…do simmer chli eitel!😉 …nei Spass beiseite…mr weiss jo it wies Wätter tatsächlich isch, aber dr Radar zeigt jetzt it grad dr büdleblutti Sunneschii! …macht nüt, ziehnd euch guet a und chömmet doch a Umzug…🙂

Mir wärde euse letschti Tag nomol gniesse und freue eus es paar bekannti Gsichter am Strosserand oder ide Beizli zgseh!🙂

 

 

Fasnachtswuche

3. Faisse / Speuz – Karsau

Nach wiederum 3 Täg usspanne hets am Donnschtig denn Ärnscht gulte…e Delegation vo eus Bierschnägge isch nach Lozärn, um dr offizielli Startchlapf mitzerläbe, alli andere hei dehei em Start entgegegfieberet. Mir alli wüsse, wenns am 3. Faisse zobe losgoht, denn hörts so schnäll au nümm uf…dis Dehei wird zunere Boxestopphütte, dis Bett gsehsch jewiils nur für churzi Zwüschestopps…wenns überhaupt no gsehsch, will meischtens gheie dr dAuge scho zue, wenns Schlofzimmer betrittsch, denn chasch froh si, wenn it näbe sNäscht gheisch!😉 …oder ufs Sofa…do hämmer au es paar Spezialischte😉 …anderi gsehnd ihres Sofa aber au eifach e Wuche nümm, will Zit zum tschille gits nit…

So, denn simmer also uf Speuz…nei das isch kei Lamafarm, sondern dr Übername vo Erlinsbach…dört stelle si es grosses Zält ufem Dorfplatz, wo mir hei dörfe spiele…das isch scho mol guet gsi…dank eusem diesjöhrige Papparazzo…oder mr müesst säge Papparazzine, hets no es paar tolli Fottene geh a dem Obe…denn isches wittergange nach Karsau…aso wenn dört idie Halle laufsch, denn chunnsch dr vor wie amene Popkonzärt, dört gits Lüt die schreie derewäg, do muesch di amme zrugghebe zfroge, öbne öppis wehtuet😉 …ich glaub es lit aber eher ade churze Hose vo eusne Manne🙂 de Uftritt het denn so richtig gfägt…ciao Teppich!!🙂 aschliessend hets denn e Tanzsession geh: Mir dörfe achünde…dBierschnägge biete nach de Fasnacht jetzt au Tanzkürs a…mir stiege i abem März mit de Modul: „Extravagantes Tanzen für Anfänger„ jewiils am Mentig und „Muskelkater im Arsch, leicht gemacht„ am Frittig. Interessierti dörfe sich gärn jederzit an uns wände!😉

Am Frittig sind denn Kienberg (Jaaaaaa, das isch in de Schwiz ;)   ) und Warmbach ufem Programm gstande. Kienberg het bestoche mit verblüffend gueter Musigqualität….ah nei, doch nit, do bini vercho!😉 Aber dHamburger, die sind würkli super gsi…

Denn witter uf Warmbach…de Event sig sit im Dezämber usverchauft gsi. Ein Maa het sooo fescht idie Halle welle und het nit dörfe, dass er im Securitas grad i Arm bisse het, isch ide Zittig gstande! Ich mein, das chammer mol mache…immer guet zum sin Unmuet usdrucke…dLüt eifach in Arm bisse😉 Denn simmer also in die Halle und das isch denn toll gsi….dört hesch chönne ielaufe und eifach säge: „Grüezi, ich hätt gärn 300 Gramm Luft…jä gärn am Stuck zum mitneh, danke! „ Aber das macht nüt, dLüt si alli verchleidet gsi und guet druf und mir au!! Wo mir gspielt hei sind die guet abgange, was au für eus immer wieder eifach toll isch! Nachem spiele sind denn es paar chli in de Halle bliebe, will die Band eifach sooo guet gsi isch😉 und anderi hei de Obe ide „Klaustro-Bar„ verbrocht…klautrophobisch äng gsi dört inne/ usse…defür hets gueti Musig gha….zum Bischbil „Bye,bye, ich wünsch mir ein Hai, Hai„ vom Cro🙂

Am Samschtig isches denn veruuse gange…Rhyfälde isch ufem Programm gstande…döt trifft mr immer wieder Lüt, wo mr kennt, mr isch echli ide Beizli unterwägs…eigentlich ganz e gmüetlichi Sach…leider hämmer vor lutter spiele ganz de Fackelumzug verpasst…ZUM GLÜCK hämmeren aber vo dinne no gseh durelaufe, das isch als wäre mr debi gsi🙂

Scho gli hets denn au wieder gheisse ufstoh…Früüüüüühstück!!! Ide Blueme hei mr wieder es herrlichs Buffet dörfe gniesse…und das Johr hei alli uffällig guet möge ässe…🙂 De Petrus hets denn leider nit ganz so guet gmeint mit eus und mr si chli nass worde am Umzug…er isch jetzt zum Glück nit sooooo lang!😉 Am Chinderball hets wieder die härzigschte Verchleidige bide Chind geh und die heftigschte Konfettischlachte…die meischte vo eus si das Johr ungschoore devo cho🙂

Nachem Chinderball simmer ufe Bus und ab zum Car, mit dem sTal druf und uf Zuzge id Halle und an dere Stell muess mr säge:

CHAPEAU ZUZGÄ!!!!

Wie geil sind denn die abgange wo mir gspielt hei????…Mir würde säge für eus ein vo de töllschte Uftritt a dere Fasnacht…es isch eifach geil, wenn sPublikum mitgoht!!!

Danke Zuzgä!!!🙂

… denn sind sie nochezoge und mir händ sie gfiiret…do het de Car also grad e  Viertelstund länger uf eus gwartet🙂 Witter isches uf Karsau gange an Narremärt…wie all Johr sind alli in verschiedeni Richtige usgschwärmt und hei dr Obe gnosse, um sich denn wieder in de Fischerstube zum spiele zträffe und am 12i denn ufem Car für uf Möhlin zude Sonderbar…

4 Täg vo de Fasnachtswuche ligge bereits hinter uns…und 2 no vor eus…mir freue uns, dass mr nochli Zit zäme dörfe verbringe!!!

Hüt zobe gohts ans Guggeopenair in Möhlin und morn gseht mr eus am Umzug au zMöhli…chömmet verbi, mir freue eus bekannti Gsichter zgseh!🙂

Fasnachtswuche

Und sReh, was macht sReh…es kocht sich none feine Teeeeeee….*sing*

Liebi Fründe vo de Bierschnägge…wie dir ade Fotigallerie vo de Bierschnägge chönnet erahne…bi eus laufts…aber so öppis vo!!!🙂

Mir hei euch vill zverzelle, sind aber soooo sträng am tolli Liedli singe und extravagant tanze (au das erkläre mr euch no🙂 …)das dr IItrag über  e Donnschtig, Frittig, Samschtig und Sunntig morn wird folge…so säge mr mol uf die 10ni!🙂

Zum Zit überbrücke, hei mir euch en exklusive Liedvorschlag : Peach Weber – Reh …so krieget ihr en chliine Iidruck, wies bi eus im Car amme zue und härgoht!😉

Bis morn…euchi Bierschnägge❤

2. Fasanchtsweekend – Dossenbach/ Warmbach /Gansingen/ Magden/ Schwörstadt

Nach es paar Tag neui Chraft tanke hets am letschte Donnschtig mitem 2. Faisse chönne wittergoh…

Zerscht simmer uf Dossebach…e Halle voll Lüt…und e Stimmig, wo jetzt eim nit us de Socke haut…defür hets dört aber anderi Guggene gha, die hei di fascht us de Socke blose! Denn isches im Dütsche wittergange…nacheme churze Carfährtli simmer in Warmbach acho und dEnttüschige si gross gsi: „Es git kei Suurchrut!„🙂 Nei, ohni Spass…dSparmassnahme hei Dütschland anschiinend fescht im Griff, jetzt het das dört eifach kei Beizli meh! Aber villicht gohts ene au eifach glich wie schiinbar villne Fasnachtsveranstalter…es het eifach leider nümm sooo vill Lüt! Macht aber nüt de Chäller isch glich cool zum Spiele und es Schnäpsli gits au all Jooohr ufs Huus😉 … immer wieder herrlich, sone Feigling zwüsche zwoi Lieder!🙂

Am Frittig isch für uns e Ruhepause agstande…anstatt „hoch die Hände Wochenende„ hets zerscht gheisse „ Füsse auf den Tisch, damit du morgen wieder fit bisch„🙂

Aber am Samschtig denn hei mers wieder lo krache…passend sMotto vo Gansige „Knall Peng„. Aso dasch ganz e glatti Sach gsi…das isch e biz, wie wenn innere Wäschstross inne spielsch…do chuttets dr umd Ohre und nass vo allne Sitte is Gsicht, ind Ohre…mr hei nur no ufd Bürschtene gwartet, wo eus vo allne Sitte suuberschrubbe😉 trotzdem hei mr alles geh und es hei doch einigi Zueschauer im Wätter trotzt und hei eus gloost…mir Fasnächtler wüsse, es git fascht kei schlächts Wätter, wo miteme Lutz nit chasch usgliiiche…dere Meinig simmer aber au nur bis uf Magde gsi…dört hets glängt, wenn 1 Minute nit under Dach gsi bisch, dass alles eifach pflotschnass gsi isch…bääähh!!! Aber das Fäscht isch jo dinne gsi, no kei Grund zur Panik also… „Keep calm and spiele mr no ein„🙂 Und was für ein! De het gsässe! Und sPublikum isch seeehr geil mitgange…

D Raucher unter uns hei aber vo dusse nit die beschte Nachrichte mitbrocht…es het immer meh afo rägne und dr Wätterradar ufem Handy het fürs Narreträffe vom andere Tag au nit sBeschte loh hoffe…mr hei eus scho mental ufs schlimmschte Wätter vorbereitet. Zerscht hets aber nomol für jede es Mützli Schlof geh…für einigi erscht nacheme Bsuech im „Casa Meier„ und ihrere Spezialität!😉

Und denn ischer do gsi de Sunntig, de Sunntig, wommer en Umzug lauft, de Sunntig wommer de ganz Tag dusse isch….de Sunntig, wos gheisse het es rägnet nur eimol und zwar vom Afang bis am Schluss…mr het sich jo scho fascht überleit sich in Zelooofaaaanfolie iiizwickle🙂 AAAAAber, de Petrus het Erbarme gha…jo aso es het amme chli gnieselet, emol während em Umzug au chli meh, aber es isch aso üüüberhaupt nit tragisch gsi…nachem Uzug hets sogar ganz ufghört und mr hei au dusse chönne ummegümmele unds luschtig ha und anderi Narre träffe…so wie sich das au ghört😉 es isch es tolls Narreträffe gsi und es het das zwoite Fasnachtsweekend gebüürend abgschlosse!

Soooo und jetzt…Freunde der Guggenmusik… wenns snechscht Mol Donnschtig wird denn gilts Ärnscht…mir hei no villi tolli Statione vor eus und mir freue eus uf no vill meh bekannti Gsichetr und gueti Stunde zäme…chömmet uns cho lose, chömmet mit uns cho fiire…es lohnt sich !!!

Minslä

Hurra, wir leben noch!!! Was fürne Obe, mir sind jetzt no chli verwirrt…aber alles de Reihe noche…

Zerscht simmer wie gwöhnlich go schminke, dSchneegestöber uf de Gsichter wärde immer besser und sind au efang schnäll druf…die drei Täg händ scho chli Üebig geh…uf no rutschigere Strosse isches denn mitem Car richtig Minsle gange…en Obe wommer sich immer druf freut, will eifach dPoscht abgoht und mir dört immer e riese Party hei. Mir sind ind Halle, hei uns schomol chli warmtanzt und sind denn igstande füre Uftritt…und vo denn a sind ganz komischi Sache passiert:

Wie sich gwüssi Lüt (also Zueschauer) während eme Uftritt benähme, das chamme eifach nit glaube!!!! Scho gli sind Lüt vo eusere Bühni gholt worde und hei denn eifach dunde dopplet so behinderet (sorry, aber das muemer so säge) wittergmacht. Näbe de Konzentration uf dStückli und wasde spielsch, muesch so immer no dAuge überall ha zum luege, dass di keine arämplet oder i Rugge gheit oder suscht irgend sone Guggus! Dr Uftritt an und für sich isch guet gsi, aber irgendöppis het sich zämebraut…bim uselaufe denn hets grumplet, will gwüssi Lüt eifach kei Alkohol möge verträge, dehei zwenig Ufmerksamkeit überchöme oder suscht eifach e verdammte Sprung ide Schüssle hei und denn nur no chönne mit Körperlichkeit reagiere…

Und a dere Stell muess ich öppis loswärde, i allere Ärnschthaftigkeit: Geschter het mr gseh, wie fescht mir fürenand iistönd…mir hei Härzflatterer gha, mir hei Kreislaufschwächene gha und Minderbemittelti,wo nur mit Füscht wei rede….aber immer isch mindischtens ei Bierschnägg do gsi zum füre ander luege…und uf das dörfe mer würkli stolz si!!!!❤

Soooo, und denn isch jo au erscht  eis gsi und no lang it Zit zum heigo…und denn heschd Wahl…äntwäder muudrig warte bis de Car fahrt oooooder auf die Tanzfläche, fertig, los…Paaartyyyy!!! Jetzt chönneter roote, welles dass mr gwählt hei🙂 …Riiichtig, Party hard!! Mir säges mol mit de Wort vo de Atzen im DiscoPogo-Lied: „Wir lassen uns das gottverdammte Feiern nicht verbieten!“ Und es isch gfiiret worde und gsunge und glachet, genau so, wie sich das für Minsle ghört…und Party isch im Car wittergange🙂 …mr muess säge, mir hei usem Obe sBeschtmögliche gmacht und Minsle het trotz allem au wieder emol grockt…

Euses erschte Weekend isch dure und mir hei scho unglaublich vill erläbt mitenand! Jetzt heissts…uskuriere, wer agschlage isch…Lippe und Blotere pfläge…neui Energie tanke für die 2ti Rundi…lueget zu euch!