Fasnachtsmentig / Fasnachtszischtig

Neinei, mir sind nit eifach vode Bildflächi verschwunde, aber mr hei zerscht die letschte zwei Fasnachtstäg müesse setzte lo und eus chli sammle, Cherusball vorbereite und durefüehre :)…

Dr Fasnachtsmentig isch ganz schnäll verzellt, das isch gsi, wie wennd Guggemuusig im Windkanal muesch mache. Genau wie letscht Joor am Guggekonzärt isches stürmisch gsi wie ne Cheib!!! Mir si die zwoitletschte gsi und scho wommer ufem Wage gwartet hei, bis mir dra chömme, het eus sLiecht entgegegschuune, das isch jo normalerwiis nit so…mr muess dezue säge, dass die Gugge vo gegenüber gspielt het leider kei Liecht gha het … dasch Päch, wenn mir während em Warte interessanter sind, als anderi bim Spiele!!! 😉 Nei, dasch dänk e Spässli, es isch amene technische Fehler gläge, dass die andere kei Liecht gha händ und mir scho *räusper* 😉 De Uftritt isch denn abgange und mir ufem Wage si schön windgschützt gsi, numme am Publikum het mr chönne gseh, dasses seeehr windig isch, dene hets nämmli dSache chrüz und quer gwindet 🙂 …nachem wittere churze Uftritt bi de Wasserfahrer isch denn au scho ufglöst gsi und alli hei chönne ummegheie, wo si hei welle, die einte ide Sunne, die andere im Warteckzält und wieder anderi eifach is Bett 🙂

Am Zischtig gits all Joor sGliche zbrichte…es beschliicht eim es ganz es komischs Gfühl…mr isch sich jo eigentlich nüt meh anders gwöhnt als ufstoh, Kostüm azieh und ab go schminke…es umgänd eim immer die gliche Gsichter, immer die gliche Stimme….ganz ehrlich, mr isch eifach innere andere Wält!!! Isoliert vo dem wo suscht so passiert, vergisst mr fascht, dass es au no es anders Läbe git…aber am Zischtig holt eim das Bewusstsii denn wieder ii…en letschte Tag zämme, die letschte Uftritt…

Euses Schminke, dReis uf Möhlin, sÄsse im Schiff….und das Wetter hält! 😉 Immer wieder sind skeptischi Blick  zum Himmel grichtet worde, will es isch Räge und Sturmwarnige agseit gsi. Au bim Istoh isch no alles guet gsi, mir sind bis zur Brugg vom Ryburg uf Möhli cho und denn hets müesse schnäll go….de Räge isch cho wiene Wand und bliebe wiene Rägeduschi.Gwüssi hei e Pellerine azoge anderi nit…es isch fascht gliich gsi,,,de Räge het si Wäg gfunde…am Kostüm entlang id Schueh ine…bääähhhh!!! Aber do kenne mr nüt, es wird fertig gloffe is Ziel!!! 🙂 Aber denn simmer ufem schnällschte Wäg is Warteck und händ dört chli eine gnoh und dHeizige beleit zum eusi Sache tröchne…nacheme zNacht isch denn wieder dr Wätterbricht checkt und eusi Route durs Dorf entsprächend plant worde. Und tatsächlich simmer denn au relativ troche durecho…mir si zude Chummerbuebe, id Sonderbar und zu guter Letzt ins MGV-Stübli…es letschts Mol zäme istoh und ufe Uftritt warte…ganz es speziells Gfühl…dr Uftritt het gfätzt und mit de letschte Tön sind die erschte Träne gloffe…es wird eim bewusst, e schöni Fasnacht nimmt wieder ihres Änd…truurig und schön zugliich! 🙂

Mittlerwiile hämmer sogar scho euse Cherusball hinter eus und dFasnacht 2017 isch für eus verbi…

Mir hei e tolli Fasnacht dörfe erläbe mit villne schöne und luschtige Momänt, wo eus wärde in Erinnerig bliebe. Mir bedanke eus bi allne, wo eus immer unterstütze und eus gärn loose und e Freud hei, wenn mir eusi Stückli zum Beschte gänd!

Euchi Bierschnägge .*

Rhyfälde / Magden Umzug / Kinderball / Zuzgen / Karsau / Möhlin

Jaja, die Ort im Titel sind dStatione, wommer die letschte 2 Täg gmacht hei 🙂

Mitem Gönnerapero am Samschtig hei mr dörfe bi schönschtem Wätter mit unserne Gönner astosse und es paar glatti Stunde verbringe, bevors denn richtig Rhyfälde and Städtlifasnacht gange isch…Uf dr erschte Bühni am Albrächtsplatz isch das ganz e glungni Sach gsi…„Härzlig Willkomme bi Netz Natur„ 🙂 oder Trudi Gärschter, bisches du? 😉 (die nachfolgenden Sendungen verzögern sich um 2 bis 3 Stunden)

Uf dr 2te Bühni bim Zähringerplatz isch denn de Moderator chli schnäller vorwärts cho mit asäge…und denn hämmer dänkt do muesch chli öppis wooge…do spiele mr doch eine mol chli experimenteller…de spielt chli das und dr ander echli das…dr eint hört scho chli uf, dr ander spielt nochli witter und denn DIE HERAUSFORDERUNG…jetzt wieder zämefinde und sLied mitenand beände…du das het tiptop klappet…do muesch dLauscherli halt mol chli spitze und loose was die andere spiele, denn lauft die Sach gli wieder 😉

Geschter isch den e Mammutprogramm agseit gsi…nacheme leckere Katerfrühstück die Blueme isches an Umzug zMagde gange ( jäjä, Magde het en Umzug…nänei, mir si sicher….nei, mir si nit zMöhli…jäjä….). Herrlichs Wätter hämmer gha…und mr si froh gsi uf dere laaaange Strecki, dass mr es paar Sunnestrahle hei dörfe gniesse 🙂 Nachem Chinderball isches denn uf Zuzge wittergange…wie immer simmer härzlich empfange worde, hei ein dörfe spiele und au Zuzger sälber dörfe lose…es isch wie immer schön gsi…danke Chluuri!

Denn es letschts Mol für das Joor i Car…es letschts Mol is Dütsch a Narremärt uf Karsau…dört isches immer gaaaanz glatt, dört gits Pisco sauer und Wisswi und kleine Feigling und 43 mit Milch und meh muemer dodezue glaub it säge 😉

Als Abschluss vo dem abrochnige Nomittag simmer denn no zrugg uf Möhlin ind Sonderbar…gueti Location, gueti Lüt…e guete Abschluss vomene Fasnachtssunntig! 🙂

Vor eus ligge die letschte zwoi Täg…hüt Guggekonzärt Möhlin und morn de Umzug…mir freue eus!

Euchi Bierschnägge :*

 

Speuz / Karsau – Laufenburg / Zeiningen

Sooodeli, mir si i die 3ti Etappe gstartet…jetzt wämmer euch mol verzelle, was mr do so alles erläbt hei, zuelose…vill Spass! 😉

Am Donnschtig simmer erneut gstartet und damol isch klar gsi, damol goht das ganze echli länger…damol gseht mr die gliiche Gsichter Tag für Tag…geile Scheiss!!! ❤

Es isch los gange in Speuz…das isch Erlinsbach, numme anderscht…dört hei mr inere Beiz gspielt, die sind seeehr froh gsi, dass mr verbi cho si…äntlich isch die Decki wieder emol abgstaubt worde!!! Denn simmer idas Zält im Dorfchärn…dört het e Gugge vor eus gspielt, wo uf jedem Register dopplet so vill Lüt gha het wie mir…sou Wand! Denn hets gheisse, sooo jetzt stönd ihr nach dene ufe und huupet ein…vill Spass!!! Chum eis Lied isch gspielt, isch sofort klar gsi, dStimmig und dEmotione si ufem Höhepunkt…not! 🙂 Egal, ab i Car und ab uf Karsau, dört kenne mr eus us 😉 Erwartet worde simmer vo zwoi hübsche Dame..de einte hei zwar dFüess chli weh gmacht, aber wo mir gspielt hei, hets doch no glängt euse Schlag chli scharf zmache 😀 Denn simmer no chli bliebe …

Neue Tag, neus Glück: Geschter simmer denn zLaufeburg iiglade gsi zum ein go huupe…Gstartet simmer im Dütsche uf dere krasse Bühni…auf den Brettern, die die Welt bedeuten 😉 aber hey, mir hei die Bühni zum place to be gmacht…gueti Sach gsi, mit villne bekannte Gsichter vorne dra…Danke an alli, wo eus chömme cho lose und eus aführe, isch immer toll villi liebi Lüt zgseh!!! ❤

Nachere churze Pause isches denn zum istoh am Märtplatz gange…denn spielet emol wieder nachere riiiiese Gugge…vill Spass!!! 😉 Kei Thema, wenn jede alles git und ineloht wiene Chue, denn lauft de Chaare!! Isch e guete Uftritt worde, voreme tolle Publikum, danke Laufenburg…das isch toll gsi!!!!!!

Jääää, denn simmer uf Zeinige gfahre…das Fäscht isch das Johr underem Motto „Welcome to Claustrophobia„ (jä, das schribt mr so 😉     )gloffe…Platz zum bewege und Ruumfreiheit asomene Fäscht wird aber würkli au überschätzt!!! 😉 Wie irgendwelchi Fuessballer oder suscht Stars, hämmer denn durd Katakombe vo de Halle hinde ufe ufd Bühni dörfe…durd Halle wersch bim beschte Wille nit cho…usser villicht mit Staitschdaiving (jäjä, das schribt mr so!! 😉   ) Denn het de Schlag vorne ade Bühni scho agloh und mir si wie so Strolche hinderem Vorhang gstande und hei eus churz überleit, wie luschtig das jetzt wer, wenn eifach kein ufd Bühni chämt und die eifach rapse und rapse….mir si denn ide Bar…vill Spass!!! 😉 Aber neeeeei, das mache mr doch nit…simmer füre tänzlet und scho de Konfettiräge het e Jubel vom Publikum gärntet…gute Voraussetzungen! 🙂 Au do hämmer e gueti Leischtig chöne abrüefe…au do hämmer es tolls Publikum gha, was nach em eint oder andere Lied für Hüehnerhuut bi de Spielende gsorgt het…danke Zeinige, das het aber würkli Spass gmacht!!!! 🙂

Denn het mr nochli ein chönne go neh, es paar hei die letschte Bierschnäggechlääber verteilt………………………….die letschte wo si debi gha hei, a dem Obe!!!! 😉   😉   😉  (glaubet nit an Geischter…!!!)

Ahhhh, das si scho zwoi Öbe gsi…huiiiiiiii!!!! Hüt gohts nachem Gönnerapero nach Rhyfälde ad Städtlifasnacht…Wer schön, wemmer au do wieder es paar würde aträffe! So und jetzt ab is Kostüm und ad Fasnacht…vill Spass!!! 😉

Euchi Bierschnägge :*

Affeparty Magden / Narreträffe Öflingen

Nacheme Obe „Ruhepause„ isch am Samschtig dAffeparty in Magde ufem Programm gstande…mir Schnägge si aber vorem Schminke scho chli früehner uf Magde gondlet, will mir zumene tolle Apero iglade gsi sind!!!Danke Raffi und Celle…es isch mega toll gsi, hämmer dörfe verbi cho! 🙂

Nacheme luschtige Schminke, wos irgendwie wieder allne zwohl gsi isch 😀 hei mr denn en churze Wäg gha ind Halle übere. Dört het mr allerhand Lüt atroffe wommer chli het chönne schnööre und will mr erscht am 12i gspielt hei, hets au guet glängt zum ade Bar ein neh….sone grüene Dschungeldrink oder echli en Martini…komisch die heisi irgendwie nur as doppletti verchauft oder? 😉 ….morgen wieder aua im Kopf!!! 🙂

Apropos „morgen„….am Sunntig isch sNarreträffe in Öflige agstande. Wommer am Morge sHuus verloh het ischs no chli e Näbelsuppe gsi, aber scho vor em Schminklokal isch denn dSunne cho und mr hei dörfe miteme sunnige Tag rächne. 🙂 Wo alli gschminkt gsi sind, isch de Car au scho parat gstande und es het chönne losgo. Euse Schofföööör (jä, das schribt mr so)…het eus amene hervorragende Plätzli chönne uslade…Grad vorere Bar ufere Wiese, wo scho villi bekannti Gsichter gstande si, wo mr gmüetlich het eine chönne neh…en Eierlikör, es Bier, es Fröschli, es Sandwich…irgenwie het das Aua im Kopf jo wieder eweg müesse 😉 Mir hei mit eusne knallige Schminkfarbe so richtig glüchtet idr Sunne!!! Denn isches nach dere Pause zum Startplatz gange, was grad no chli e Fuessmarsch gsi isch…zum Glück hei die Dütsche überall mobili Bars, wo immer wieder chli chasch go zwüscheverpflääge 😉 …denn hämmer chli tschillt (jäjä, das schribt mr so) a eusem 51ste Startplatz, gwartet bis alli dört gsi sind (isch chli länger gange 😉 …) und denn gwartet bis mr het chönne laufe und denn gwartet bis dUmzugsstrecki au würkli agfange het.Es het denn e Huffe Lüt am Strosserand gha und sWätter isch ideal gsi, nit zwarm nit zchalt…es isch e laaaange Umzug gsi und nach einere Kurve het mr au gar nüm rächt gwüsst, öb das no zum Umzug ghört oder öb mr scho fertig sind…mir hei denn beschlosse, dass es für eus fertig isch und mr no ein gönd go neh, bevor mr am 6i ufe Car müend… Es isch en tolle, sunnige Tag gsi und mir hei luschtigi Stunde mitenand chönne verbringe!!! En bsundere Dank goht an Henry, euse persönliche Täfelibueb, wo eus sit einiger Zit treu voruslauft und stolz sis eigene „Bierschnägge mit Henry„-Täfeli treit.

Scho hämmer die erschte zwei Etappe hinter eus brocht und warte jetzt uf die dritti…uf die langi…uf die richtigi!!! 🙂 Mir freue eus uf nomeh luschtigi Momänt, tolli Fäschter und bekannti Gsichter 🙂

 

Euchi Bierschnägge :*

2. Faisse:- Warmbach/ Zuzgen

Nachere Wuche Regenerationspause isches geschter wieder so wiit gsi. Ab ins Kostüm, Schminki is Gsicht und ab geht die Luzi! 🙂

Mitem Car isches Richtig Warmbach gange…aber erscht mol id Richtig, denn hämmer nämmli jedi Richtig wo uf Warmbach füehrt eimol usprobiert…wommer denn acho si,isch au klar worde werum…e riiiiese Baustell…mir hei gar nit gwüsst, dassd Gotthardröhre in Warmbach usechunnt 😉

Mir hei de Wäg zum Chäller denn aber glich gfunde und händ denn aber leider in sälbigem nit chönne spiele…will mir si da Johr eifach zvill, mir hätte kei Platz gha 😉 nei Spässli natürli, es hei scho es paar anderi gspielt…kei Thema, denn spiele mr halt im Zält näbedra. Das isch tiptop gange, im Agi sini Showiilage sind au no vomene nätte Herr mit Megaphon kommentiert worde, sozsäge wie vom Benni Turnherr vo de Fasnacht 🙂 En andere nätte Herr het öppis ztrinke verbiibrocht…aso guet, er het es Bächerli verbiibrocht, mit Flüssigem din …In  Warmbach   isch das immer eher e Muetproob das Shöttli…will mr nie weiss öbbs chasch süfferle oder de Bode putze oder sKostüm fläckefrei mache…da mol isch es eigentli ganz ok gsi 🙂

Nachem Huupe hei mr no schnäll e Abstächer id Bar gmacht, dört het no e nätte Herr gschaffet…de het eus 8 Shöttli parat gmacht…denn hetter gseit das choschti 12 Euro…alles klar….denn hetter gseit, nei doch nit 12 das sig zwenig…es choschti 9 Euro….okeeee!          Verschaufstaläääääänt erkenne mer, wemmers gsend!!    🙂   Hämmerem, grosszügig wiemer si, 10 Euro geh!!!..

Denn simmer witter uf Zuzge…DIE METROPOLE des Fricktals…(jo sorry, biz Heimatpatriotismus des Schreiberlings muess dinneligge 😉  …)

Inelaufe, anestoh, abdrucke…und denn LAUFT DE TÖFF!!!! ….  wenns eus nit gäbt, das wer e Tragödie, wer würd denn de ganz Martini und Jägermeischter trinke und wer würd gege Morge piindlich tanze ide Halle??? Und wer würd so schön orientalisch klingle bim Fudigwaggle???…aahhh ebbe hä!!!

Aso mir hei bim Uftakt zur zweite Fasnachtsetappe geschter scho richtig vill Spass gha und guet gfiiret!!! Danke Chluuri für e wieder emol gluungnige 2. Faisse!!!

Hüt hämmer e chliini Ruhepause (offiziell; nit verschrecke, wenn dr die einte oder andere Schnägge uf de Gass gsend…die dörfe das! 😉 …) Am Samschtig gämmer denn mol dLokalmatadooore (jä, das schribt mr so) adr Affeparty in Magde…mir freue eus uf villi bekannti Gsichter! Am  Sunntig denn gohts ans Narreträffe in Öflingen…mir wärde euch brichte, was mr dört wieder alles verruckts erläbe!!!

Euchi Bierschnägge

Schraddeparty / Nordschwaben – Kaisten

Nacheme glungene Uftakt am erschte Faisse, isches am Frittig direkt wittergange. Es het wieder sDütsche grüeft. Bim Beträtte vo de Location in Nordschwoobe het mr scho fascht chli klaustrophobischi Zueständ becho…bummsvoll die Halle oder de Schopf…oder was au immer das isch…kulturells Center…kulturell….jä nei, isch klar! 😉 …zu eusere Kultur adem Fäscht ghörts, dass mr Pissbottle um Pissbottle leere und chli mit Jägermeischter experimentiere…sovill Kultur muess si! 🙂 Bim Spiele isch das immer sone Sach dört…es git jetzt Sache wo irgendwie agnähmer und unkomplizierter si…zum Bispiil mit ere Rolle Stacheldroht kuschle…aso in punkto Beneh, wenn e Gugge spielt würde mr eus ehrlich gseit es bizli meh Kontänoooos (ja, das schribt mr so) erhoffe!…Guggemitglieder arämple, as Instrumänt länge und dure Gugge während em spiele durelaufe chunnt halt eifach nie in Mode und stosst immer nur uf mittelmässig vill Begeischterig eusersitts. Nichtsdestotrotz isch dr Uftritt eigentlich cool gsi und het glaub gfägt… De Agi isch glaub sooo begeischteret gsi, dasser grad chli usem Konzäpt cho isch, wobi ich glaub, er het eus eifach öppis welle ztrinke spendiere…Chef, säg doch das snächscht mol eifach, no spiele mr das Lied auno fertig! 😉 Nachem Uftritt hei denn verschiednigi Lüt dr Obe unterschiedlich gstaltet: chli trinke, chli lache, chli enand dSchminki versueche vom Gsicht schläcke (bääähhhh 😉 …) Denn hämmer natürlich au no andere Guggene zuegluegt, wobi eus vorallem eis Exemplar is Aug gstoche isch…ei Posunischt isch zwar mit sine Lüt iegloffe , het aber glaub de ganz Uftritt kei Plan gha, was für es Lied er grad spielt oder wer die luschtig gschminkte Lüt rund um ihn umme überhaupt si!…ufere Skala vo 1-10 eidüttig es Zwölfi!!! 🙂 E glatte Obe mit ville luschtige Gstalte und au skurile Begegnige isch zänd gange und alli si uf ihri Chöschte cho…

Geschter isch denn dr Uftritt am Hurliball in Kaiste ufem Programm gstande. Eus isch im Car akündet worde, dasses denn ufem Heiwäg Chlöpfer git…nei, nit die chliiine Schnäpsli, Wüüüüürscht!!! Jede het das chli anderscht verstande und sich chli e anderi Vorstellig vo de Heimreis gmacht…aber das chunnt jo erscht spöter… in Kaiste simmer als erschti Gugge dra gsi und es het doch scho ordentli Lüt gha, wo eus zuegloost hei…und mr muess säge: geschter isch es aber gloffe!…irgendwie hets alli packt und am Gsicht vom Agi isch abzläse gsi…ganz so schlächt chas it töne 🙂 SPublikum isch würkli toll gsi und es het riesig Spass gmacht zspiele!!! Nachem Uftritt hämmer wieder chli Kultur und Tradition gmacht…Shöttlibrätter, Shöttlibaaar!!!! 🙂 au do isches gloffe 🙂 Zit isch schnäller umme als mr het chönne dänke und denn isch dHeifahrt agstande…die isch das mol chli spezieller abgloffe…chum abgfahre, hei mr au scho wieder aghalte …ich glaub mir si die einzig Gugge wo unterwägs ahaltet zum Würscht verteile…hejo, sone Snack zwüschedure! Denn sind no Lüt vo eus iiirgendneume usgstiege…spöter isch denn klar worde, sie hei no en Uftritt mit de Schwyzergoofe gha….schubidubidubi, mir gwaggle mitem Fudi… 🙂

Heieiei, was füres Wucheänd!!! Scho ischs erschte Fasnachtsweekend verbi und mir hei scho sooo vill erläbt! Jetzt wärde Händ gschoonet, Lippe pflägt und Chräft tankt für die zwoiti Etappe…bis gli…euchi Bierschnägge :*

1.Faisse

Es isch wieder soooooo wiiit! 🙂

Geschter isches äntlich richtig und offiziell losgange! Wer dBierschnägge kennt weiss, am 1.Faisse gohts uf Karsau is Sprützehüüsli! Uf de Bänk, hinter de Bänk, zwüsche Bei vo fremde Lüt…überall wird gspielt…aber solang die fremde Lüt öppis ztrinke zahle, isch da scho guet 😉 Isch guet gloffe würde mr mol säge…au die Aquarium nohär…läuft bei uns!!! 🙂

Wommer alli Aquarium trunke und alli Frösch gässe hei, simmer uf Obermumpf gfahre…das wer eigentlich ganz e guets Fäscht, wenns nit immer so vill Lüt hätt! Das Gedrucke und Gedränge…denn findsch dini Lüt nümm…dasch aso schono e Tschällensch (jä, das schribt mr so :)…) Aber wenigschtens hämmer denn suuuuper gspielt…vorallem sHeaven ischis würkli gloffe…das isch eigenlich scho fascht e legendäri Version gsi….NOOOOT!!! 😀

E Grossteil isch denn witter uf Hellike (au die, wos eigentlich anderscht plant hei….do wer jetzt das Äffli guet,wo dAuge zuehebt)

Denn hämmer de Taxischofföööse (jä, das schribt mr so) …zeigt, dass mir chönne zaubere…die het guet gluegt, wo zHellike 3 meh usgstiege si weder zObermumpf i! 🙂

Denn het de Peter Wackel zHellikä chli „aber scheiss drauf„ gmacht…und ich glaub paar vo eusne hei das au gmacht!! 🙂 Anderi hei denn hei müesse und hei gfühlt jeeeedem idere Halle vorghület wie unfair das isch ….jömmertroooscht (jä, das schribt mr so)

Jo, das ischer gsi, dr Uftakt…mir si igloffe und parat für hüt und morn… 🙂