Mentig, Zischdig, Mittwuch

Jä es isch so wiit, mir hei gester d Fasnacht abgschlosse 😦

Aber do mueni euch no vo de letschde Tage verzelle vorher.
Am Mentig heimer uspfuset und eus erschd Zobe droffe furs Guggekonzert z Möhlin.
De Uftrit sowie s Publikum isch tiptop gsi. Mir hei eus den nomol versammlet für en Uftrit im No Limit Zält was au grosse Spass gmachd het. Vorher isch chräftig tanzt worde zu 80er Sound. Nach dem isch Uflösig gsi und die meischde hei den no chli s ganze Dorf uskundschaftet.

Am Zischdig heimer eus widr Früe droffe zum schminke. Leider si einigi vo eus zimli agschlage … es isch au eifach sau chalt die ganz Zit. Im Schiff hets e feins Zmitag gä vor em Umzug, mir sind sozäge de Bäsewage gsi. Defür het d Sunne für eus gschunne.
Im Ziel hets no e Uftrit uf em Wage gä, vor mir widr sind go Ässe 🙂
jede het jetzt gwüse es god nur no e par Stündli und me isch langsam Sentimental worde.
nach em Uftrit bi de Ryburger simer no zu de Sonderbar ufe und als letschde Uftrit am 12i bi de MGV no par Trändli vergosse. Anderi hets sogar vom Bank abegworfe…
au do si no e par umedrümlet und i jedi Bar no eis go zie.

Es isch also Tatsach au die Fasnacht isch widr viel z schnäl umegange und me het so viel Idrück und au so viel schöns i denä Tage erläbt. Wen me nid debi gsi isch, weis me gar nid wie sich das afüült. Me trift sich jede Tag und het eifach blos Spass wie e chlini Familie.
ich wird euch die negschde Tage Wuche vermisse bis me widr id Normalität zruggfunde het.

Gester heimer simbolisch no d Fasnacht verbrent und euse Presi het no par nätti Wort gfunde bis me den bi de Mälsupe uf em Dornhof de Obe usklinge loh het.

am Samschdig hoffe mr no e uf en super Cherusball mit euch allne…

 

3 Faisse, Fritig Samschdig und Sunntig

am Donschdig heimer eus als aller erschds z Kaiste im Warteck gstärkt mit de beste Älplermagrone womer scho je gässe hei! Den isch es is fast usgstorbne Laufeburg gange uf 2 Gigs in de Schwiz und Dütschland begleitet simer worde vo de Barocker! Den widr i Car an Wildeball z Karsau! Dört isch de Obe mit Tanze und Fotoboxe usklunge!

Am Fritig simer traditionhalber uf Laufeburg as Guggekonzert! Schön heimers gha jede isch chli umezoge i de verschiidene Bar und Restaurant und me het sich für 3 Uftrit immer widr Versamlet! Bim letschde Uftrit isch alles chli drunter und drüber gange! Im Summer 69 mues me viel Alkohol drunke ha, das hei mir au gmerkt, evt hets wäg dem den au e jungle-charlotta geh! Aber das heimer den eifach z Laufeburg gloh😂

Samschdig Guggekonzert Rhyfelde läck du mir, die Stimmig! Das traumhafte Publikum! Ich chum isch Schwärme und ha Hüenerhut gha! Die hei Pfiffe, Zuegruefe, Tanzt, Gumpet und Blollonaise gmacht womer gspielt hei! Es het mega Spass gmachd!

Am Suntig het me früe us de Fädere müese, nur eine het Usfschlofe😂 im Auki heimer euses Katerfrühstück gha mit Lachs, Bierchermüesli, Fleisch und Chees im Buch heimer eus ufgmachd an Start vo dem Umzug! Guet heimer eus gsärkt suschd hete mr d Chraft uf dem grosse Umzug nid gha! Am aschliesende Chinderball heimer eus den chli erholt und d Bei hochglageret! Jede het gwüst es god praktisch ums überläbe bi 7h Narremarkt Karsau mit sine ca.250 Feigling! Stolz das mrs gschaft hei und mit e chli Schmärze i de A…backe vom schunkle simer widr i Car und hei i de Sonderbar no e Ufteit gha! De Car isch den  retour und es par Drümlige si no go Möhli  besichtige!

Hüt obe isch Guggekonzert z Möhli womer 21.15 Uhr z ghöre si

 

2. Februar Rhyfälde

Au geschder simmer unterwägs gsi und nach Schminke und eme Churze go neh simmer z Rhyfälde uf de Kunsti glandet. „Schnägge on ice“ isch eigentlich s Motto vo dem Obe gsi… da hemmer aber gli umgänderet uf „Schnägge vorem Plüschtierautomat“. Jetz händ doch die Zähringer tatsächlich so gueti alti Plüschtierautomate ufgstellt – und denn no zwoi, wiemer spöter gmerkt hend. No vor eusem Uftritt isch de ersti Automat mit vill Strategie, Fachwüsse und Fiingfühl für Winkel und Joysticks halb gleert worde und eusi Kostüm und Instrument hend richtig tolli Accessoires übercho. Vo Schnägge über Üle bis hii zu Schissihüfeli isch alles debii gsi. Zuesätzlich simmer au no mit kunterbunte Plüsch-Schmättergagene usgrüstet worde… wenn scho, denn scho. Scho gli hets gheisse ab ufd Bühni und los ischs gange mitem Uftritt. Da isch also witzig gsi z spile

vorvillefahrende,stehende,unbekannteundeinigebekannteGäst🙂 (DankeadereStellfürs cho und fane🙂 ) Euse Spilfüehrer het allerdings d Perspektive vo sim Platz us it esooo witzig gfunde, er het jo usserem Schlag und de ville Plüschtier it eso vill gseh… aber es git jo uf jedes Problem e Lösig und so het halt churzerhand s Dach vom Schlittschuehbänkli müesse diene… ke Problem für ihn, er het jo brueflichi Vorteil gha und da fachmännisch glöst. Alles in allem ischs also eigentlich e glungene Uftritt gsi.

Nochhee simmer denn verschidene Aktivitäte nochegange: Glüehwii und Bier trinke, esse, zemmehöckle und denn isch de zwoiti Plüschtier-Automat entdeckt worde. Also het mer nomol alli Strategie uspackt und Äffli, Bärli und Hamburger gfischt. Jäää wenns lauft, denn laufts ebe. Schlussendlich isch denn d Iis-Disco langsam z End gange und für e paar Schnägge au de Obe. Einigi Schnägge si no wiiter gange und mer sind also ganz gspannt was die hüt so z verzelle hend im Schminkrüümli🙂

Glii ischs nemli wider so wit und hü hemmer jo Heimspiel wenns heisst: Ab ad Affeparty 🐵

Murg Narreträffe

Läck isch das schnäl Morge worde….
9.30 Uhr isch me mehr oder weniger früsch vor de Molherei gstande.
Mit gsponseretem Späck, Zopf und Schoggi isch es allne au bald besser gange.
Chan au am reparatur Bächer glägä si.
Henry Hase euse treu Täfelibueb isch au zum Schminke aträte.
Am 12i isch de Car richtig Murg as Narreträffe gstartet.
Dört heimer bald euse Platz unter de Startnummerä 91 gfunde.
Den het sich jede chli neume verwiilt, go ässä, eis go nä, oder sich mit altebekannte Guggegspändli unterhalten.
Euses chlinschde Bierschnäggli het tanzt wie verruckt und het alli Blick uf sich zoge.
Eifach e chline Siidebolle.
Mir hei no e Platzkonzert geh, nach churzer Zit het eine grandios im Kreis vo eus tanzt, es Pärli im Hintergrund Disofox tanzt und eusi Pauke isch au no unterstützt worde. Grande!!!
Genau so Momänt mache d Fasnacht us.
13.31 Uhr isch de Umzug losgange mir sind aber erschd 16 Uhr gstartet, es het no mega viel Lüt am Strosserand gha wo uf eus gwaret hei 
De Umzug het sowit Spass gmachd.
Sind den gege 17 Uhr im Ziel glandet und e Stund spöter isch scho de Car in richtig Heimat gfahre.
Jetzt no 3 Tag erhole und den gods au scho i die Finalewoche. Bis bald ihr liebe

2 Faisse Zuzgen

looosss starte mr is zwoite Weekend!

Früsch gschminkt gods is Rössli Rhyfälde go esse!! Euses Ziel hüt, e Bsuech bi de Chluurizunft Zuzge! Z Rhyfälde Städtliderab bets no e batle geh mit de Grüttis! 　De Car isch am 9ni z Zuzge glandet und d Halle isch scho recht vol gsi! Weg dem simer au motiviert uf d Bühni ufe, hei Rönewei, Dingsidongsi, Charlöttchen, Stoh uf und s obligatorische Aschnalle zum beschde gä! S Publikum isch guet drufe gsi, einigi bekanti Gsicher drunter gsi wo eus agfürt hei

Nachere Bierstärkig si Zeiniger cho Stimmig mache, d Räblüüs und d Helliker!

Au das wer e absolut glungne Obe gsi!

Hüt Obe gods ufs Eis, Disco uf de Kunsti Rhyfelde mir freue eus! Mir spiele 20.40 Uhr

 

Samschdig Trienge

Zum schminke aträte si zuesätzlich 4 tolli Gäst, mir alli sind nachem schminke gmüetlich in Adler go Znachtässe! Pegy und de Alex hei eus den uf Trienge gfahre! Zerschd het jede dört chli d Lag abtschegt! Bar, Kaffistube oder Guggehalle! Aber id lang het mes usghalte ohni de kompletti Verrein! Chum simer widr ali gsi, isch Post abgange! Singe, tanze und de bald scho traditionelli Bierschnägge-Kreiss isch bildet worde! Jede het sis beschde im Kreis dörfe vortanze und het unter kreische und klatsche jewils de volschdi Respeckt kriegt! 😂

Vor eus hei Gugge gspielt die sind guet dopplet so gross gsi wie mir! Trotzdem si mir mit erhobenem Haupt dört ine und hei doch e guete Uftrit z stand brocht für da, dass es doch scho 8h her isch womer eus gschmikt hei!

Uf de Rückfahrt isch Pegy no mit Würst und Brot dur de Car gjagt worde! Gsund und glücklich über de schöni Obe simer am 4i z Magde widr glandet! Das wer also scho s 1 Faisse Weekend gsi! I freu mi scho Granate druf was z zwoite bringt… bis bald

1 Faisse Fritig

Am Fritig heimer chöne usschlofe! Womer sich widr troffe het, het no jede sini chliine Hielight-Gschichtli vom gestrige Obe priis gä! Hüt gods ad Schraadeparty uf Nordschwobe! Me mues sich dert zerschd echli igruufe! Viel Lüt wenig Ruum, aber tolli Stimmig und alles verchleideti Gäst! Piisbotle isch also glofe!
Ganz im Gegeteil zu Obermumpf hei d Lüt do gar kei Müe mit Körperkontank bim Uftrit gha! Heiss isch es gsi, d Farb isch eus vom Chopf glofe! Aber de Headbangers hets gfalle! Eusi Pauke het so guet gspielt, dass si churzerhand no z Holland igsetzt worde isch! De Obe het me den au dert usklinge loh.. und Hüt mache mr eus uf e lange Wäg richtig Luzern, Trienge bald chömemer!

1 Faisse

Es isch so wiit es god loooossss🎊🎉
Voller Vorfreud heimer eus i de Mohlerei troffe und ganz gspannt gwartet wie mir gchminkt wärde! Mir gfalle eusi Gsichter sehr guet, danke liebs Schminkteam! Nach Ghackts mit Hörndli bi de Slaviza heimer e Bode gha fürs Aquarium in Karsau!! Bim Uftrit simer vomene legendäre Spielfüerer begleitet worde! Grossartig Benj het Spass gmachd! Nach Güpli und Aquarium simer i Car richtig Obermumpf gstiege! I glaub mir hei e bizeli gschweisselet, d Lüt hei Abstand ghalte😂 deno isch de Car für de „gmüetlich“ Teil no uf Hellike gfahre und dört hets nur no gheise „Prost“
Tolle Uftakt-Obe gsi

Fasnachtsmentig / Fasnachtszischtig

Neinei, mir sind nit eifach vode Bildflächi verschwunde, aber mr hei zerscht die letschte zwei Fasnachtstäg müesse setzte lo und eus chli sammle, Cherusball vorbereite und durefüehre :)…

Dr Fasnachtsmentig isch ganz schnäll verzellt, das isch gsi, wie wennd Guggemuusig im Windkanal muesch mache. Genau wie letscht Joor am Guggekonzärt isches stürmisch gsi wie ne Cheib!!! Mir si die zwoitletschte gsi und scho wommer ufem Wage gwartet hei, bis mir dra chömme, het eus sLiecht entgegegschuune, das isch jo normalerwiis nit so…mr muess dezue säge, dass die Gugge vo gegenüber gspielt het leider kei Liecht gha het … dasch Päch, wenn mir während em Warte interessanter sind, als anderi bim Spiele!!! 😉 Nei, dasch dänk e Spässli, es isch amene technische Fehler gläge, dass die andere kei Liecht gha händ und mir scho *räusper* 😉 De Uftritt isch denn abgange und mir ufem Wage si schön windgschützt gsi, numme am Publikum het mr chönne gseh, dasses seeehr windig isch, dene hets nämmli dSache chrüz und quer gwindet 🙂 …nachem wittere churze Uftritt bi de Wasserfahrer isch denn au scho ufglöst gsi und alli hei chönne ummegheie, wo si hei welle, die einte ide Sunne, die andere im Warteckzält und wieder anderi eifach is Bett 🙂

Am Zischtig gits all Joor sGliche zbrichte…es beschliicht eim es ganz es komischs Gfühl…mr isch sich jo eigentlich nüt meh anders gwöhnt als ufstoh, Kostüm azieh und ab go schminke…es umgänd eim immer die gliche Gsichter, immer die gliche Stimme….ganz ehrlich, mr isch eifach innere andere Wält!!! Isoliert vo dem wo suscht so passiert, vergisst mr fascht, dass es au no es anders Läbe git…aber am Zischtig holt eim das Bewusstsii denn wieder ii…en letschte Tag zämme, die letschte Uftritt…

Euses Schminke, dReis uf Möhlin, sÄsse im Schiff….und das Wetter hält! 😉 Immer wieder sind skeptischi Blick  zum Himmel grichtet worde, will es isch Räge und Sturmwarnige agseit gsi. Au bim Istoh isch no alles guet gsi, mir sind bis zur Brugg vom Ryburg uf Möhli cho und denn hets müesse schnäll go….de Räge isch cho wiene Wand und bliebe wiene Rägeduschi.Gwüssi hei e Pellerine azoge anderi nit…es isch fascht gliich gsi,,,de Räge het si Wäg gfunde…am Kostüm entlang id Schueh ine…bääähhhh!!! Aber do kenne mr nüt, es wird fertig gloffe is Ziel!!! 🙂 Aber denn simmer ufem schnällschte Wäg is Warteck und händ dört chli eine gnoh und dHeizige beleit zum eusi Sache tröchne…nacheme zNacht isch denn wieder dr Wätterbricht checkt und eusi Route durs Dorf entsprächend plant worde. Und tatsächlich simmer denn au relativ troche durecho…mir si zude Chummerbuebe, id Sonderbar und zu guter Letzt ins MGV-Stübli…es letschts Mol zäme istoh und ufe Uftritt warte…ganz es speziells Gfühl…dr Uftritt het gfätzt und mit de letschte Tön sind die erschte Träne gloffe…es wird eim bewusst, e schöni Fasnacht nimmt wieder ihres Änd…truurig und schön zugliich! 🙂

Mittlerwiile hämmer sogar scho euse Cherusball hinter eus und dFasnacht 2017 isch für eus verbi…

Mir hei e tolli Fasnacht dörfe erläbe mit villne schöne und luschtige Momänt, wo eus wärde in Erinnerig bliebe. Mir bedanke eus bi allne, wo eus immer unterstütze und eus gärn loose und e Freud hei, wenn mir eusi Stückli zum Beschte gänd!

Euchi Bierschnägge .*

Rhyfälde / Magden Umzug / Kinderball / Zuzgen / Karsau / Möhlin

Jaja, die Ort im Titel sind dStatione, wommer die letschte 2 Täg gmacht hei 🙂

Mitem Gönnerapero am Samschtig hei mr dörfe bi schönschtem Wätter mit unserne Gönner astosse und es paar glatti Stunde verbringe, bevors denn richtig Rhyfälde and Städtlifasnacht gange isch…Uf dr erschte Bühni am Albrächtsplatz isch das ganz e glungni Sach gsi…„Härzlig Willkomme bi Netz Natur„ 🙂 oder Trudi Gärschter, bisches du? 😉 (die nachfolgenden Sendungen verzögern sich um 2 bis 3 Stunden)

Uf dr 2te Bühni bim Zähringerplatz isch denn de Moderator chli schnäller vorwärts cho mit asäge…und denn hämmer dänkt do muesch chli öppis wooge…do spiele mr doch eine mol chli experimenteller…de spielt chli das und dr ander echli das…dr eint hört scho chli uf, dr ander spielt nochli witter und denn DIE HERAUSFORDERUNG…jetzt wieder zämefinde und sLied mitenand beände…du das het tiptop klappet…do muesch dLauscherli halt mol chli spitze und loose was die andere spiele, denn lauft die Sach gli wieder 😉

Geschter isch den e Mammutprogramm agseit gsi…nacheme leckere Katerfrühstück die Blueme isches an Umzug zMagde gange ( jäjä, Magde het en Umzug…nänei, mir si sicher….nei, mir si nit zMöhli…jäjä….). Herrlichs Wätter hämmer gha…und mr si froh gsi uf dere laaaange Strecki, dass mr es paar Sunnestrahle hei dörfe gniesse 🙂 Nachem Chinderball isches denn uf Zuzge wittergange…wie immer simmer härzlich empfange worde, hei ein dörfe spiele und au Zuzger sälber dörfe lose…es isch wie immer schön gsi…danke Chluuri!

Denn es letschts Mol für das Joor i Car…es letschts Mol is Dütsch a Narremärt uf Karsau…dört isches immer gaaaanz glatt, dört gits Pisco sauer und Wisswi und kleine Feigling und 43 mit Milch und meh muemer dodezue glaub it säge 😉

Als Abschluss vo dem abrochnige Nomittag simmer denn no zrugg uf Möhlin ind Sonderbar…gueti Location, gueti Lüt…e guete Abschluss vomene Fasnachtssunntig! 🙂

Vor eus ligge die letschte zwoi Täg…hüt Guggekonzärt Möhlin und morn de Umzug…mir freue eus!

Euchi Bierschnägge :*